គ្រូបង្រៀនចោទមន្ត្រីមន្ទីរអប់រំខេត្តកណ្ដាលថាលក់ឯកសារផលិតស្ថិតិបុគ្គលិក

គ្រូបង្រៀនខេត្តកណ្ដាល ចោទមន្ត្រីមន្ទីរអប់រំយុវជន និងកីឡាខេត្តនេះ ថាបានលក់កម្រងសំណួរសម្រាប់ផលិតស្ថិតិបុគ្គលិកអប់រំឆ្នាំ២០១៤ ជូនគ្រូបង្រៀន ក្នុង១សន្លឹក ១ពាន់រៀល។ ប៉ុន្តែមន្ត្រីមន្ទីរអប់រំខេត្តកណ្ដាល បដិសេធថា ឯកសារទាំងនេះ មន្ទីរ ឬក្រសួងមិនតម្រូវឲ្យលក់ដូរទេ។

គ្រូបង្រៀននៅសាលាអនុវិទ្យាល័យគគីរ លោក ម៉ៃ សុភ័ក្រត្រា ស្ថិតក្នុងចំណោមគ្រូបង្រៀនតាមសាលាផ្សេងទៀត នៅស្រុកកៀនស្វាយ ខេត្តកណ្ដាល។ លោកបានឲ្យដឹងនៅថ្ងៃច័ន្ទ ទី២ ខែធ្នូ ថា ឯកសារកម្រងសំណួរសម្រាប់ផលិតស្ថិតិបុគ្គលិកអប់រំ ឬធ្វើជំរឿនគ្រូបង្រៀននៅឆ្នាំ២០១៤ ត្រូវនាយកសាលានីមួយៗ លក់ជូនគ្រូបង្រៀន ក្នុង១ស្លឹកមានតម្លៃ ១ពាន់រៀល។

ផ្ដើមពីបញ្ហានេះ បុគ្គលិកអប់រំ ឬគ្រូបង្រៀននៅខេត្តកណ្ដាល ស្នើឲ្យស្ថាប័នពាក់ព័ន្ធ មានក្រសួង ឬមន្ទីរអប់រំជាដើម ជួយបំភ្លឺ និងមានវិធានការជាបន្ទាន់ ព្រោះឯកសារទាំងនេះមានមូលនិធិភាពជាដៃគូសម្រាប់អភិវឌ្ឍន៍សមត្ថភាពវិស័យអប់រំជាអ្នកឧបត្ថម្ភ៖ «ពីឆ្នាំទៅគេយកតែ ៥០០រៀលទេ ឆ្នាំនេះគេយក ១ពាន់រៀល។ ជំរឿននេះគឺធ្វើសម្រាប់ឆ្នាំ២០១៤ គឺគេយក ១ពាន់រៀលតែម្តង។ យើងចង់ឲ្យក្រសួងអប់រំហ្នឹងជួយពិនិត្យមើលឡើងវិញ ថាតើអ្វីដែលខេត្តកណ្ដាល ឬស្រុកកៀនស្វាយ ធ្វើហ្នឹងជាតម្រូវការរបស់ក្រសួង ឬក៏មន្ទីរ ឬក៏មន្ត្រីក្នុងវិស័យអប់រំ ដូចជានៅស្រុកកៀនស្វាយ ឬមន្ទីរអប់រំខេត្តហ្នឹងកាត់ដោយខ្លួនឯង ឬក៏មានគោលការណ៍ពីក្រសួង។ បើសិនជាមានគោលការណ៍ពីក្រសួង សូមឲ្យក្រសួងហ្នឹងចេញវិធានការ ឬក៏សារាចរណាមួយណែនាំដល់បុគ្គលិករបស់គាត់»។

ក្រុមគ្រូបង្រៀនខេត្តកណ្ដាល បានលើកជាចម្ងល់ថា តើការលក់ឯកសារកម្រងស្ថិតិបុគ្គលិកអប់ នៅតាមសាលាមួយចំនួន មន្ត្រីក្រសួង ឬមន្ទីរអប់រំខេត្តតម្រូវឲ្យលក់ ឬក៏បុគ្គលថ្នាក់ក្រោម អនុវត្តផ្ទុយពីការណែនាំក្រសួង ឬមន្ទីរអប់រំ?

ឆ្លើយតបបញ្ហានេះ លោក លី ជុងថេង ប្រធានមន្ទីរអប់រំខេត្តកណ្ដាល បានបដិសេធថា មន្ទីរ ឬក្រសួងមិនតម្រូវឲ្យនាយកសាលានីមួយៗ លក់ឯកសារកម្រងសំណួរសម្រាប់ផលិតស្ថិតិបុគ្គលិកអប់រំឆ្នាំ២០១៤ ជូនគ្រូបង្រៀននោះទេ។ ប៉ុន្តែលោកថ្លែងថា នឹងពិនិត្យចំពោះបញ្ហាមិនប្រក្រតីទាំងនេះ៖ «អត់មានឲ្យលក់ដូរឯកសារអីហ្នឹងទេ ពីក្រសួងក៏ដោយ ពីមន្ទីរក៏ដោយ អត់ឲ្យលក់ដូរទេ។ ប្រហែលជាអាចមានបុគ្គលធ្វើដូច្នេះ។ ចាំខ្ញុំពិនិត្យមើលបញ្ហាហ្នឹង។ អរគុណ!»។

ទោះយ៉ាងណា លោក រ៉ុង ឈុន ប្រធានសមាគមគ្រូបង្រៀន ក៏បានស្នើដល់លោក ហង់ ជួនណារ៉ុន រដ្ឋមន្ត្រីក្រសួងអប់រំ ឲ្យជួយពិនិត្យបញ្ហាលក់កម្រងសំណួរសម្រាប់ធ្វើស្ថិតិបុគ្គលិកអប់រំឆ្នាំ២០១៤ ជាបន្ទាន់ ព្រោះឯកសារទាំងនេះមិនតម្រូវឲ្យលក់ដូរទេ៖ «បើយើងពិនិត្យទៅលើកម្រងសំណួរហ្នឹង មានការឧបត្ថម្ភពីសហគមន៍អឺរ៉ុប ពីប្រទេសស៊ុយអែត ពីអង្គការយូនីសេហ្វ និងពីមូលនិធិភាពជាដៃគូសម្រាប់អភិវឌ្ឍន៍សមត្ថភាពវិស័យអប់រំ។ អ៊ីចឹងមានន័យថា កម្រងសំណួរនេះ បើតាមអ្វីដែលយើងទទួលបានព័ត៌មាន គឺត្រូវចែកជូនលោកគ្រូអ្នកគ្រូមិនគិតថ្លៃ។ ប៉ុន្តែផ្ទុយទៅវិញ មន្ត្រីអប់រំលក់ជូនលោកគ្រូអ្នកគ្រូក្នុងតម្លៃខ្ពស់ ក្នុងមួយសន្លឹក ១ពាន់រៀល។ យើងចាត់ទុកថា នេះជាអំពើពុករលួយមួយ ហើយយើងស្នើឲ្យលោករដ្ឋមន្ត្រីក្រសួងអប់រំ ធ្វើការស៊ើបអង្កេតជុំវិញករណីនេះ»។

បញ្ហានេះដែរ មន្ត្រីក្រសួងអប់រំឆ្លើយថា មិនទាន់បានដឹងព័ត៌មានលក់កម្រងសំណួរសម្រាប់ស្ថិតិបុគ្គលិកអប់រំ ឆ្នាំ២០១៤ នៅខេត្តកណ្ដាល នេះទេ។ ប៉ុន្តែនឹងពិនិត្យចំពោះបញ្ហានេះ៕

ប្រភព៖RFA