បក្សសង្គ្រោះជាតិបង្កើតគណៈកម្មការការពារនិងគាំពារបាតុករ

មន្ត្រីគណបក្សសង្គ្រោះជាតិបង្ហើបឲ្យថា បក្សសង្គ្រោះជាតិកំពុងរៀបចំបង្កើតគណៈកម្មការមួយដើម្បីចាត់ចែង និងការពារក្រុមបាតុករដែលស្នាក់នៅទីលានប្រជាធិបតេយ្យក្នុងអំឡុងពេលយុទ្ធនាការបាតុកម្មរយៈពេលបីខែនេះ។បេក្ខជនតំណាងរាស្ត្រជាប់ឆ្នោតបក្សសង្គ្រោះជាតិ អ្នកស្រី មូរ សុខហួរ មានប្រសាសន៍ប្រាប់វិទ្យុអាស៊ីសេរី នៅថ្ងៃទី១៨ ធ្នូ ថា គណៈកម្មការនេះនឹងចែកជា ៦
ក្រុម ហើយក្នុងមួយក្រុមៗមានសមាជិកប្រហែល ២០នាក់ មានតួនាទីចាត់ចែង និងទទួលខុសត្រូវក្រុមបាតុករ ២៤ម៉ោង លើ ២៤ម៉ោងតាមវេនរបស់ខ្លួនដែលប្រចាំការ។

អ្នកស្រីបន្តថា ក្រុមនីមួយៗមានតួនាទីរ៉ាប់រងផ្នែកសន្តិសុខ សុខាភិបាល ស្បៀងអាហារ ចំពោះក្រុមបាតុករដែលមកធ្វើបាតុកម្ម។

ស្របពេលនេះដែរ បក្សសង្គ្រោះជាតិ បានសង់រោងស្នាក់នៅបន្ថែមទៀត ក្នុងបរិវេណទីលានប្រជាធិបតេយ្យ សម្រាប់ក្រុមបាតុករស្នាក់នៅ។

ក្រុមបាតុករបក្សសង្គ្រោះជាតិគ្រោងហែក្បួនបាតុកម្មនៅម៉ោង ៤ល្ងាច ថ្ងៃទី១៨ ធ្នូ នេះ តែមន្ត្រីបក្សមិនទាន់បានប្រាប់ឲ្យដឹងអំពីទិសដៅនៃការហែក្បួននៅឡើយទេ។ ក៏ប៉ុន្តែក្នុងគណនេយ្យហ្វេសប៊ុក (Facebook) របស់ប្រធានបក្សសង្គ្រោះជាតិ លោក សម រង្ស៊ី បានផ្សាយផែនទីបង្ហាញផ្លូវហែក្បួនបាតុកម្មថា ក្បួនហែចេញពីទីលានប្រជាធិបតេយ្យ តាមផ្លូវលេខ៥១ គឺផ្លូវប៉ាស្ទ័រ រហូតដល់កែងផ្លូវព្រះសីហនុ រួចបត់ស្ដាំ រហូតដល់កែងមហាវិថីមុនីរ៉េត ត្រង់ភ្លើងស្តុបអាងទឹកស្តាតអូឡាំពិក បត់ស្ដាំ រហូតដល់រង្វង់មូលនាងគង្ហីង បត់ឆ្វេងតាមផ្លូវ១៦៩ មុខវិទ្យាល័យបាក់ទូក រហូតដល់កែងផ្លូវកម្ពុជាក្រោម បត់ស្ដាំឆ្ពោះទៅផ្លូវព្រះមុនីវង្ស រួចបត់ឆ្វេងទៅផ្លូវក្រមួនស ហើយចូលទីលានប្រជាធិបតេយ្យវិញ។

សូមរង់ចាំស្ដាប់ព័ត៌មាននេះពិស្ដារ... RFA