បន្ទាប់ពីបានចុះទៅពិនិត្យមើលមហន្តរាយព្រៃឈើក្នុងតំបន់ព្រៃឡង់ កាលពីពេលថ្មីៗនេះមេដឹកនាំគណបក្សសង្គ្រោះជាតិបានជំរុញឱ្យរដ្ឋាភិបាលលោក ហ៊ុន សែន បញ្ឈប់ជាបន្ទាន់នូវការផ្តល់ដីសម្បទានសេដ្ឋកិច្ចរយៈពេល៩៩ឆ្នាំ នៅតំបន់ព្រៃឡង់ទៅឱ្យក្រុមហ៊ុនបរទេស។ មេដឹកនាំគណបក្សសង្គ្រោះជាតិបានឃើញយ៉ាងច្បាស់ថាដើមឈើធំៗត្រូវបានគេកាប់រំលំសម្រាប់នាំចេញ ចំណែកដើមឈើតូចៗត្រូវបានក្រុមហ៊ុនប្រើគ្រឿងចក្រឈូសឆាយបំផ្លាញរួចដុតចោលតែម្តង។ នេះជាមហន្តរាយនៃធនធានធម្មជាតិដ៏មានតម្លៃនៅក្នុងប្រទេសកម្ពុជា ហើយលោក ហ៊ុន សែន នាយករដ្ឋមន្ត្រីនៃគណបក្សចាញ់ឆ្នោត គឺជាអ្នកទទួលខុសត្រូវធំជាងគេ ព្រោះលោក ហ៊ុន សែន ជាអ្នកលើកដៃស៊ីញ៉េលើអាជ្ញាប័ណ្ណដីសម្បទានសេដ្ឋកិច្ចប្រគល់ឱ្យក្រុមហ៊ុនយួន។
បើតាមរបាយការណ៍របស់អង្គការក្រុមការងារពិសេសសិទ្ធិមនុស្សកម្ពុជា ដែលជាអង្គការមួយទើបបង្កើតថ្មីដើម្បីឃ្លាំមើលការបំផ្លាញធនធានធម្មជាតិក្នុងប្រទេសកម្ពុជាបានរកឃើញថារដ្ឋាភិបាលលោក ហ៊ុន សែន បានផ្តល់ដីសម្បទានសេដ្ឋកិច្ច សម្បទានព្រៃឈើនិងសម្បទានរ៉ែរយៈពេល៩៩ឆ្នាំ ដល់ក្រុមហ៊ុនឯកជនចំនួន៣៤នៅតំបន់ព្រៃឡង់។ ក្នុងចំណោមក្រុមហ៊ុនទាំង៣៤នោះគឺមានក្រុមហ៊ុនសម្បទានព្រៃឈើចំនួន៥ គ្របដណ្តប់លើផ្ទៃដីជាង៧៤ម៉ឺនហិកតា, ក្រុមហ៊ុនសម្បទានសេដ្ឋកិច្ចចំនួន១៥គ្របដណ្តប់លើផ្ទៃដីជាង១៥ម៉ឺនហិកតា និងក្រុមហ៊ុនសម្បទានរ៉ែចំនួន១៤ ដែលគ្របដណ្តប់នៅលើផ្ទៃដីរហូតដល់ទៅជាង២៨ម៉ឺនហិកតា។ សរុបផ្ទៃដីដែលក្រុមហ៊ុនទាំង៣៤ កាន់កាប់រយៈពេល៩៩ឆ្នាំ នៅតំបន់ព្រៃឡង់គឺមានជាង១,៤លានហិកតា ដែលជាមូលហេតុនាំឱ្យមានបទឧក្រិដ្ឋបំផ្លាញព្រៃឈើក្នុងប្រទេសកម្ពុជាយ៉ាងមហន្តរាយ។ ជាងនេះទៅទៀតប្រជាពលរដ្ឋខ្មែររាប់ពាន់រាប់ម៉ឺនគ្រួសារ ជាពិសេសជនជាតិដើមភាគតិចរស់នៅតំបន់ព្រៃឡង់កំពុងប្រឈមនឹងការបាត់បង់មុខរបរប្រពៃណីរបស់ខ្លួន ក៏ដូចជាប៉ះពាល់ជីវភាពប្រចាំថ្ងៃ។
មន្ត្រីអង្គការក្រៅរដ្ឋាភិបាលបានរកឃើញថាក្នុងចំណោមក្រុមហ៊ុនទាំង៣៤ ដែលទទួលបានដីសម្បទានសេដ្ឋកិច្ចពីរដ្ឋាភិបាលលោក ហ៊ុន សែន គឺក្រុមហ៊ុនយួនមានរហូតដល់ទៅ៨០ភាគរយ ហើយឥឡូវនេះតំបន់ព្រៃឡង់ត្រូវបានក្រុមហ៊ុនយួនដាក់ឈ្មោះទីក្រុងសៃហ្កន ដែលជាក្រុងលំដាប់ទីពីររបស់យួន។ ទង្វើបែបនេះគឺជាគ្រោះថ្នាក់ធ្ងន់ធ្ងរបំផុតសម្រាប់កម្ពុជា ព្រោះអីសូម្បីតែតំបន់ព្រៃឡង់ក៏ត្រូវក្រុមហ៊ុនយួនដាក់ឈ្មោះជាទីក្រុងក្នុងប្រទេសរបស់ខ្លួនដែរ។ អាចនិយាយបានថាក្រុមហ៊ុនយួនកំពុងតែទទួលបានផលចំណេញពីរយ៉ាង គឺកាប់ព្រៃឈើខ្មែរលក់ក្នុងតម្លៃរាប់ពាន់លានដុល្លារ និងអាចអនុវត្តន៍គោលនយោបាយពង្រីកពូជសាសន៍តាមបណ្តាំរបស់ ហូ ជីមិញ យ៉ាងងាយស្រួល។ រយៈពេល៩៩ឆ្នាំ នៃការវិនិយោគរបស់ក្រុមហ៊ុនយួន គឺជាការសម្រេចជោគជ័យដ៏ធំធេងក្នុងការបំផ្លាញធនធានធម្មជាតិរបស់ខ្មែរ និងពង្រីកពូជសាសន៍នៅលើទឹកដីខ្មែរយ៉ាងរលូន។
ក្រុមអ្នកសង្កេតការណ៍ឯករាជ្យបានលើកឡើងថា កន្លងមកក្រុមមេដឹកនាំគណបក្សប្រជាជនជាពិសេសលោក ហ៊ុន សែន តែងតែអួតអាងថាកម្ពុជា មានឯករាជ្យភាពនិងអធិបតេយ្យភាពពេញលេញ។ ក៏ប៉ុន្តែតាមពិនិត្យជាក់ស្តែងប្រទេសកម្ពុជាបច្ចុប្បន្ននេះមិនខុសពីអំឡុងទសវត្សរ៍ឆ្នាំ១៩៨០ ដែលស្ថិតក្រោមការគ្រប់គ្រងរបស់រដ្ឋាភិបាលកុម្មុយនិស្តក្រុងហាណូយនោះទេ។ ជាការពិតរដ្ឋាភិបាលលោក ហ៊ុន សែន កំពុងតែបម្រើប្រយោជន៍រដ្ឋាភិបាលយួនរបស់នាយករដ្ឋមន្ត្រី ង្វៀន តិនយុង ដោយយកចិត្តទុកដាក់បំផុត ដូចជាការគាំពារជនអន្តោប្រវេសន៍យួនរស់នៅលើទឹកដីខ្មែរជាដើម។ ជាងនេះទៅទៀតទោះបីប្រទេសយួនបន្តសកម្មភាពរំលោភឈ្លានពានទឹកដីខ្មែរតាមតំបន់ព្រំដែនក្នុងខេត្តស្វាយរៀង និងខេត្តកំពង់ចាមយ៉ាងណាក៏លោក ហ៊ុន សែន មិនដែលហ៊ានបញ្ចេញប្រតិកម្មមួយម៉ាត់ណាឡើយ។
នៅពេលដែលព័ត៌មានជុំវិញរឿងក្រុមហ៊ុនយួនបំផ្លាញព្រៃឈើខ្មែរក្នុងតំបន់ព្រៃឡង់ឱ្យរលត់រលាយត្រូវបានលាតត្រដាងជាសាធារណៈគេឃើញអ្នកនាំពាក្យស្ថានទូតយួនប្រចាំកម្ពុជាបានព្យាយាមបិទបាំងបញ្ហានេះយ៉ាងក្រអឺតក្រទម។ អ្នកនាំពាក្យស្ថានទូតយួនឈ្មោះ ត្រាង វ៉ាន់ថុង បាននិយាយយ៉ាងគឃ្លើនថាក្រុមហ៊ុនយួនដែលមកវិនិយោគនៅកម្ពុជា គឺក្នុងគោលបំណងបង្កើនសេដ្ឋកិច្ចនៃប្រទេសដែលមានភូមិផងរបងជាមួយគ្នា។ ការលើកឡើងរបស់អ្នកនាំពាក្យស្ថានទូតយួនបែបនេះ គឺជាការព្យាយាមបិទបាំងការពិតចំពោះសកម្មភាពដែលក្រុមហ៊ុនយួនបំផ្លាញព្រៃឈើខ្មែរក្នុងតំបន់ព្រៃឡង់និងតំបន់ផ្សេងៗទៀតឱ្យរលត់រលាយ។ ប៉ុន្តែទោះជាយ៉ាងណាមន្ត្រីស្ថានទូតយួនមិនអាចបិទបាំងការពិតបានទេ ព្រោះពេលនេះព្រៃឈើនៅក្នុងតំបន់ព្រៃឡង់ត្រូវបានក្រុមហ៊ុនយួនបំផ្លាញស្ទើរតែរលត់រលាយទៅហើយ។ មេដឹកនាំគណបក្សសង្គ្រោះជាតិបានឃើញផ្ទាល់ភ្នែកចំពោះមហន្តរាយព្រៃឈើនៅក្នុងតំបន់ព្រៃឡង់ដូច្នេះគ្មាននរណាអាចបិទបាំងការពិតបានឡើយ។
ក្រុមអ្នកសង្កេតការណ៍ឯករាជ្យបានលើកឡើងថា ការដែលរដ្ឋាភិបាលលោក ហ៊ុន សែន ផ្តល់ដីសម្បទានសេដ្ឋកិច្ច សម្បទានព្រៃឈើ និងសម្បទានរ៉ែ ឱ្យក្រុមហ៊ុនយួនវិនិយោគ បាននាំមកនូវគ្រោះមហន្តរាយដ៏ធំធេងដល់សង្គមជាតិខ្មែរ។ បញ្ហាទាំងអស់នេះរដ្ឋាភិបាលលោក ហ៊ុន សែន គឺជាអ្នកទទួលខុសត្រូវទាំងស្រុង ព្រោះរយៈពេល៩៩ឆ្នាំទៀត មិនដឹងថាប្រទេសខ្មែរត្រូវប្រឈមនឹងគ្រោះថ្នាក់បែបណាឡើយ។ ឥឡូវនេះប្រជាពលរដ្ឋខ្មែរនៅមានឱកាសល្អសម្រាប់ទប់ស្កាត់កុំឱ្យក្រុមហ៊ុនយួនបំផ្លាញព្រៃឈើនិងសម្បត្តិធម្មជាតិរបស់ខ្មែរតទៅទៀតតាមរយៈការទម្លាក់លោក ហ៊ុន សែន ចេញពីអំណាចឱ្យខាងតែបាន។ ដោយហេតុថាបើលោក ហ៊ុន សែន នៅដឹកនាំ ប្រទេសតទៅទៀត គឺប្រទេសកម្ពុជាអាចប្រឈមនឹងគ្រោះថ្នាក់ធ្ងន់ធ្ងរបំផុត ព្រោះលោក ហ៊ុន សែន បម្រើផលប្រយោជន៍យួននិងផលប្រយោជន៍ចិនដោយខ្វះការពិចារណា។ ការដែលប្រជាពលរដ្ឋខ្មែរភាគច្រើនលើសលប់ទាមទារឱ្យលោក ហ៊ុន សែន ចុះចេញពីអំណាចនៅពេលនេះ គឺជារឿងសមស្របបំផុតដើម្បីទប់ទល់កុំឱ្យមានគ្រោះថ្នាក់ដល់សង្គមជាតិខ្មែរតទៅទៀត។
បញ្ហាដ៏ធំមួយនៅពេលនេះគឺយួនកំពុងតែសម្រេចគោលនយោបាយពង្រីកពូជសាសន៍តាមបណ្តាំរបស់ ហូ ជីមិញ ក្នុងដំណើរឆ្ពោះទៅទិសខាងលិចជាក់ ស្តែងអន្តោប្រវេសន៍យួនអាចរស់នៅនិងប្រកបរបរចិញ្ច្ឹមជីវិតយ៉ាងសុខសាន្តនៅលើទឹកដីខ្មែរ។ ក្រុមហ៊ុនយួនដែលទទួលបានដីសម្បទានសេដ្ឋកិច្ចកំពុងនាំមកជាមួយនូវបុគ្គលិកនិងកម្មកររាប់ពាន់រាប់ម៉ឺននាក់មកបម្រើការងារក្នុងក្រុមហ៊ុនរបស់ខ្លួន ហើយពួកគេអាចពង្រីកពូជសាសន៍លើទឹកដីខ្មែរយ៉ាងអនាធិបតេយ្យ ព្រោះរដ្ឋាភិបាលលោក ហ៊ុន សែន គាំពារជនជាតិយួនខ្លាំងណាស់៕
Labels:
ព័ត៌មានជាតិ
Previous Article
