ក្រុមអាល់កៃដាប្រកាសថាខ្លួនជាអ្នកសម្លាប់អ្នកយកព័ត៌មាន RFI នៅម៉ាលី

ដោយ សេង ឌីណា

កាលពីល្ងាចថ្ងៃពុធ ៦ វិច្ឆិកាម្សិលមិញនេះ ក្រុមភេរវជនអាល់កៃដាប្រចាំតំបន់អាហ្វ្រិកខាងជើង (AQMI) បានប្រកាសថា ខ្លួនគឺជាអ្នកចាប់ខ្លួន និងសម្លាប់អ្នកយកព័ត៌មានពីរនាក់របស់ RFI នៅម៉ាលី កាលពីថ្ងៃសៅរ៍។ រដ្ឋមន្រ្តីក្រសួងការបរទេសបារាំងបានអះអាងថា ការប្រកាសរបស់ក្រុម AQMI នេះ អាចជារឿងដែលគួរឲ្យជឿបាន។

ក្រុម AQMI (Al Qaïda au Maghreb islamique) បានប្រកាសទទួលស្គាល់ការសម្លាប់អ្នកយកព័ត៌មាន RFI គឺ Ghislaine Dupont និង Claude Verlon តាមរយៈព័ត៌មានដែលបញ្ជូនទៅចុះផ្សាយនៅលើវិបសៃត៍ដែលមានប្រភពចេញពីប្រទេសម៉ូរីតានី ឈ្មោះថា "Sahara Médias"។

គេដឹងថា វិបសៃត៍ Sahara Médias តែងតែដឹងព័ត៌មានច្រើនពីក្រុមភេរវជនអ៊ីស្លាម ក្នុងតំបន់អាហ្វ្រិក ហើយកន្លងមក នៅពេលដែលក្រុម AQMI ធ្វើការវាយប្រហារភេរវកម្ម ឬក៏មានការចាប់ចំណាប់ខ្មាំងណាមួយ AQMI តែងតែចេញមុខប្រកាសទទួលខុសត្រូវ តាមរយៈ វិបសៃត៍ Sahara Médias នេះ។

ម្យ៉ាងទៀត នៅក្រោយពីឃើញមានសេចក្តីប្រកាសរបស់ក្រុម AQMI កាលពីម្សិលមិញ RFI បានទាក់ទងទៅសួរបញ្ជាក់ព័ត៌មាននេះពីនិពន្ធនាយករបស់ Sahara Médias ហើយនិពន្ធនាយកបានប្រាប់ RFI ថា Sahara Médias បានបញ្ជាក់ពីប្រភពច្បាស់លាស់ថា ការប្រកាសទទួលខុសត្រូវនេះ គឺពិតជាចេញពីក្រុម AQMI ពិតប្រាកដមែន។

លោកឡូរ៉ង់ ហ្វាប៊្យូស រដ្ឋមន្រ្តីការបរទេសបារាំង ក៏ដូចជា ប្រភពពីមន្រ្តីយោធាបារាំង បានឲ្យដឹងថា ការអះអាងរបស់ក្រុម AQMI នេះអាចជារឿងដែលគួរឲ្យជឿបាន។ ក៏ប៉ុន្តែ គេនៅតែមានមន្ទិលសង្ស័យជុំវិញគោលដៅពិតប្រាកដរបស់ក្រុម AQMI ក្នុងការសម្លាប់អ្នកកាសែតទាំងពីររូបនេះ។

អ្នកនាំសាររបស់ ក្រុម AQMI បានអះអាងថា ការសម្លាប់អ្នកកាសែតបារាំងទាំងពីររូបនេះ គឺដើម្បីជាការដាក់ទោសដល់ប្រទេសបារាំង និងដាក់ទោសដល់លោកប្រធានាធិបតីហ្វ្រង់ស័រ ហូឡង់ ដែលបានធ្វើអន្តរាគមន៍យោធា នៅក្នុងប្រទេសម៉ាលី។ ក៏ប៉ុន្តែ សំណួរចោទឡើងថា បើសិនជាគេគ្រាន់តែចង់សងសឹកចំពោះអន្តរាគមន៍យោធាបារាំងពិតមែន ហេតុអ្វីបានជាពួកគេមិនសម្លាប់អ្នកយកព័ត៌មានទាំងពីរភ្លាមៗនៅនឹងកន្លែង? ហេតុអ្វីបានជាត្រូវចាប់ខ្លួន នាំយកទៅសម្លាប់រហូតដល់ទៅជាង ១០គីឡូម៉ែត្រពីកន្លែងចាប់ខ្លួន?

ម្យ៉ាងទៀត ក្រុម AQMI ដដែលនេះ ទើបនឹងដោះលែងចំណាប់ខ្មាំងបារាំង ៤នាក់ កាលពីថ្ងៃអង្គារ ២៩តុលា គឺ ៤ថ្ងៃមុនការសម្លាប់អ្នកយកព័ត៌មាន RFI។ ដូច្នេះ បើសិនជា AQMI ពិតជាមានបំណងចង់សម្លាប់ជនជាតិបារាំង ដើម្បីផ្ញើសារនយោបាយចំពោះរដ្ឋាភិបាលបារាំងពិតមែន ហេតុអ្វីបានជាមិនសម្លាប់ចំណាប់ខ្មាំងទាំង ៤នាក់នេះ? ហេតុអ្វីបានជាដោះលែងចំណាប់ខ្មាំងទាំង ៤នាក់ ហើយ ៤ថ្ងៃក្រោយមក ទើបមកចាប់ខ្លួនចំណាប់ខ្មាំងថ្មីយកទៅសម្លាប់ទៅវិញ?

នៅពេលនេះ សេណារីយ៉ូដែលគេនាំគ្នាលើកឡើងភាគច្រើន គឺថា ការណ៍ដែលក្រុម AQMI ចាប់ខ្លួន និងសម្លាប់អ្នកយកព័ត៌មានបារាំងនេះ មិនមែនធ្វើឡើង ក្នុងគោលដៅនយោបាយទេ ប៉ុន្តែ វាជាការចាប់ចំណាប់ខ្មាំង ដើម្បីជំរិតទារយកលុយ ដូចដែល AQMI ធ្លាប់ធ្វើពីមុនៗ។ ប៉ុន្តែ ដោយសារតែមានបញ្ហាអ្វីមួយនៅតាមផ្លូវ ប្រហែលជាឡានខូច ភ័យខ្លាចគេតាមទាន់ ទើបប្រញាប់ប្រញាល់សម្លាប់ចំណាប់ខ្មាំងចោល ដើម្បីរត់យកតែរួចខ្លួន។ ក៏ប៉ុន្តែ នេះគ្រាន់តែជាសម្មតិកម្មមួយប៉ុណ្ណោះ។ គេនៅរង់ចាំលទ្ធផលស៊ើបអង្កេតរបស់ប៉ូលិសបារាំង និងម៉ាលីជុំវិញរឿងនេះ។

បើតាមលោកប្រធានាធិបតីបារាំង ហ្វ្រង់ស័រ ហូឡង់ ការស៊ើបអង្កើតនេះមានការជឿនលឿនទៅមុខច្រើន។ ប៉ូលិសស៊ើបអង្កេតបារាំងត្រូវបានបញ្ជូនឲ្យទៅម៉ាលី ដើម្បីចូលរួមក្នុងការស៊ើបអង្កេត ហើយគិតមកទល់នឹងថ្ងៃពុធម្សិលមិញនេះ មានជនសង្ស័យយ៉ាងតិច ៣៥នាក់ត្រូវបានគេចាប់ខ្លួនយកមកសាកសួរ។

ឥឡូវនេះគេកំពុងតែតាមរកចាប់ខ្លួនមនុស្ស ៤នាក់ ដែលគេសង្ស័យថាជាជនដៃដល់ក្នុងការចាប់ខ្លួន និងសម្លាប់អ្នកកាសែត RFI ទាំងពីរ។ តាមប្រភពដែលស្និទ្ធនឹងដំណើរការស៊ើបអង្កេតនេះ គេថា ជនសង្ស័យទាំង ៤នាក់នេះ ត្រូវបានគេកំណត់អត្តសញ្ញាណរួចហើយ។ គេអាចកំណត់អត្តសញ្ញាណជនសង្ស័យទាំង ៤នាក់នេះបានតាមរយៈឯកសារ ដែលគេរកឃើញ នៅក្នុងឡានដែលជនសង្ស័យទុកចោល នៅកន្លែងដែលពួកគេសម្លាប់អ្នកយកព័ត៌មានបារាំងទាំងពីរនាក់។

តាមអត្តសញ្ញាណ ដែលគេកំណត់បាន ក្នុងចំណោម ៤នាក់នេះ ២នាក់មានជាប់ពាក់ព័ន្ធនឹងក្រុម AQMI ហើយ ២នាក់ទៀត មិនជាប់ពាក់ព័ន្ធនឹងក្រុមភេរវជនទេ។ នេះអាចជារឿងធម្មតា ពីព្រោះថា នៅអាហ្វ្រិក មានក្រុមខ្លះមិនមែនជាភេរវជនទេ ប៉ុន្តែជាឧក្រិដ្ឋជនធម្មតា ដែលស៊ីឈ្នួលចាប់ចំណាប់ខ្មាំងឲ្យក្រុម AQMI៕

ប្រភព៖RFI