ស្រ្តីខ្មែររងគ្រោះដោយជំងឺមហារីកមាត់ស្បូនមានច្រើន

យ៉ាងហោចណាស់មានស្ត្រីកម្ពុជាប្រមាណជា៤០០០នាក់បានកើតជំងឺមហារីកមាត់ស្បូនជារៀងរាល់ឆ្នាំ។ភ្នំពេញ៖ យ៉ាងហោចណាស់មានស្ត្រីកម្ពុជាប្រមាណជា៤០០០នាក់បានកើតជំងឺមហារីកមាត់ស្បូនជារៀងរាល់ឆ្នាំ។ ជំងឺនេះកំពុងឈរនៅលំដាប់ថ្នាក់ខ្ពស់បំផុតក្នុងចំណោមជំងឺមហារីកដទៃទៀតក្នុងប្រទេស។

លោកវេជ្ជបណ្ឌិត អ៊ាវ សុខា ប្រធានផ្នែកជំងឺមហារីកនៃមន្ទីរពេទ្យកាល់ម៉ែតមានប្រសាសន៍ថាជារៀងរាល់ថ្ងៃមានអ្នកជំងឺមហារីក៣០នាក់មកទទួលការពិនិត្យព្យាបាលក្នុងមន្ទីរពេទ្យក្នុងនោះប្រហែលជា៨នាក់ជាអ្នកជំងឺមហារីកមាត់ស្បូន។

លោកបានឱ្យដឹងបន្តថាស្ថានភាពជំងឺនេះមិនមានលក្ខណៈល្អប្រសើរឡើយចាប់តាំងពីជាង១០ឆ្នាំមុនមកហើយមានប្រហែល៤០០០ករណីក្នុង១ឆ្នាំៗ

«មហារីកមាត់ស្បូននៅតែជាជំងឺមហារីកដែលជួបប្រទះញឹកញាប់ជាងគេ១០ឆ្នាំជាងហើយខ្ញុំឃើញថាទំនោរហ្នឹងអត់ទាន់ឃើញល្អជាងមុនសោះពីព្រោះអីប្រជាជនយើងមកដល់មន្ទីរពេទ្យច្រើននៅដំណាក់កាលធ្ងន់ធ្ងរដែលការព្យាបាលឱ្យជាសះស្បើយមិនអាចធ្វើទៅបាន»។

លោកវេជ្ជបណ្ឌិត អ៊ាវ សុខា បានឱ្យដឹងបន្ថែមថាអ្នកជំងឺមហារីកមាត់ស្បូនចំនួន៧២ ភាគរយមកមន្ទីរពេទ្យនៅដំណាក់កាលទី៣និងទី៤ដែលជាដំណាក់កាលឈានដល់ភាពធ្ងន់ធ្ងរនិងពិបាកក្នុងការព្យាបាល។

ជាមួយគ្នានោះដែរលោកវេជ្ជបណ្ឌិត គួយ សំណាង ប្រធានផ្នែកជំងឺមហារីកនៃមន្ទីរពេទ្យមិត្តភាពខ្មែរ សូវៀតបានឱ្យដឹងដែរថាភាគច្រើនអ្នកកើតជំងឺមហារីកមាត់ស្បូនក្នុងប្រទេសកម្ពុជាស្ថិតនៅក្នុងវ័យក្មេង។

«ប្រទេសគេគឺគិតពី៣៥ទៅ៤០ហើយដល់ប្រទេសយើងតាមការសិក្សាថ្មីៗដែលយើងធ្វើទៅមានពីអាយុ២៨ឆ្នាំ។ ធម្មតាទេក្មេងបែបនេះកំពុងតែមានសកម្មភាពនៅក្នុងសង្គមសម្រាប់រកលុយតែបែរជាឈឺវិញមានពេលឯណារកលុយមិនមានត្រឹមតែមិនបានរកលុយទេអស់លុយទៀតខាងពេទ្យរដ្ឋក៏ត្រូវចំណាយលើក្មេងៗនេះដែរ»។

យោងតាមរបាយការណ៍របស់ក្រសួងសុខាភិបាលដែលបានផ្សព្វផ្សាយកាលពីឆ្នាំ២០០៨
បង្ហាញឱ្យដឹងថាជំងឺមហារីកមាត់ស្បូនមានអត្រាច្រើនជាងគេបំផុតក្នុងចំណោមជំងឺមហារីកដែលកើតមានលើស្ត្រីនៅកម្ពុជា។ របាយការណ៍បន្ថែមថាស្ត្រីដែលមានជំងឺស្ទើរទាំងអស់បានស្លាប់ក្នុងវ័យក្មេង។

លោកស្រីវេជ្ជបណ្ឌិត ពឹង ជុតិមា នាយិកាសមាគមថែទាំសុខភាពគ្រួសារកម្ពុជាហៅកាត់ថារ៉ាក់បានឱ្យដឹងថាចំនួនអ្នកកើតជំងឺមហារីកមាត់ស្បូននៅប្រទេសកម្ពុជាគឺជាចំនួនមួយគួរឱ្យព្រួយបារម្ភនិងត្រូវមានវិធានការឱ្យមានប្រសិទ្ធភាពក្នុងការទប់ស្តាត់ជំងឺនេះ។
«ចាត់ទុកថាវាជាបញ្ហាមួយដែលយើងគួរកង្វល់ពីព្រោះដោយសារតែជំងឺមហារីកបើសិនយើងបានធ្វើការស្រាវជ្រាវវានៅដំណាក់កាលទាន់ពេលវេលាគឺអ្នកនោះមិនមានជំងឺមហារីកទេពីព្រោះយើងទៅព្យាបាលបានហើយ»។

លោកស្រីវេជ្ជបណ្ឌិត ប្រាក់ ពិសិដ្ឋរង្សី ប្រធាននាយកដ្ឋានការពារសុខភាពនៃក្រសួងសុខាភិបាលបានមានប្រសាសន៍ថាមូលហេតុដែលនាំឱ្យស្ត្រីកម្ពុជាប្រឈមមុខនឹងគ្រោះថ្នាក់នៃការកើតមហារីកមាត់ស្បូនច្រើនបែបនេះកត្តាសំខាន់គឺកង្វះអនាម័យ កង្វះព័ត៌មាន ការយល់ដឹង និងភាពអៀនខ្មាស់របស់ស្ត្រីខ្មែរ។

«អត្តចរិករបស់ស្ត្រីយើងវិញគឺគាត់មិនចង់ទៅឱ្យគេបើកមាត់ស្បូនគាត់មើលទេ ហេតុ ដូច្នេះទោះបីជាយើងខំផ្សព្វផ្សាយយ៉ាងណាក៏ដោយក៏ជួនកាលទៅគាត់មានការខ្មាស់អៀនច្រើនគាត់មិនបានមកតាមការផ្សព្វផ្សាយរបស់យើងទេហើយក្រសួងសុខាភិបាលក៏ចេះតែខិតខំប្រឹងប្រែងតាមគ្រប់រូបភាពទាំងអស់។ បច្ចុប្បន្នកាលនេះគឺយើងចង់ឱ្យស្ត្រីទាំងអស់ដែលចាប់ពីអាយុ៣០ដល់៤៩ឆ្នាំឱ្យគាត់អញ្ជើញមកមន្ទីរពេទ្យដើម្បីធ្វើការស្រាវជ្រាវរកជំងឺមហារីកមាត់ស្បូននេះ»។

លោកស្រីវេជ្ជបណ្ឌិតមានប្រសាសន៍ថាដើម្បីកាត់បន្ថយជំងឺមហារីកមាត់ស្បូននេះ ក្រសួង បានធ្វើការបណ្តុះបណ្តាលមន្ត្រីជំនាញតាមមន្ទីរពេទ្យឱ្យចេះស្វែងរកជំងឺនេះទាន់ពេលវេលាមានការចុះ អប់រំស្ត្រីនៅតាមភូមិ និងតាមមន្ទីរពេទ្យ ពេលស្ត្រីមកទទួលយកសេវាផ្សេង។ ម្យ៉ាងវិញទៀតលោកស្រីវេជ្ជបណ្ឌិតបានទទួលស្គាល់ថាការផ្សព្វផ្សាយអំពីជំងឺនេះនៅមានកម្រិតនៅឡើយពីព្រោះថវិកាក្នុងការចំណាយនៅមានការខ្វះខាតជាច្រើន។

យោងតាមរបាយការណ៍របស់ក្រសួងសុខាភិបាលដដែលបានឱ្យដឹងបន្ថែមថានៅលើសាកលលោកក្នុង១ឆ្នាំស្រី្តច្រើនជាង៤៦ម៉ឺននាក់បានកើតជំងឺនេះដែលក្នុងនោះជាង២៣ម៉ឺននាក់បានស្លាប់ហើយជិត៩៥ភាគរយកើតនៅក្នុងប្រទេសកំពុងអភិវឌ្ឍន៍ដូចជាប្រទេសកម្ពុជាជាដើម។

ក្រុមគ្រូពេទ្យជំនាញបានផ្តល់ដំបូន្មានថាជាទូទៅស្ត្រីដែលធ្លាប់ឆ្លងកាត់ការរួមភេទរួចហើយត្រូវពិនិត្យរកជំងឺមហារីកមាត់ស្បូនឱ្យបានម្តងក្នុង១ឆ្នាំ៕